டெல்லி: மே மாதத்திற்கான மொத்தவிலை பணவீக்க விகிதம் 0.79% ஆக உயர்ந்துள்ளதாக மத்திய அரசு தெரிவித்துள்ளது. கடந்த ஆண்டு மே மாதத்தில் மொத்தவிலை பணவீக்க விகிதம் 0.34% ஆக இருந்தது குறிப்பிடத்தக்கது. தற்போது தொடர்ந்து 2-வது மாதமாக சில்லரை வர்த்தக பணவீக்கமும் அதிகரித்து காணப்படுகிறது. நுகர்வோர் விலை குறியீட்டின் அடிப்படையில் சில்லரை வர்த்தக பணவீக்கம் வெளியிடப்பட்டு வருகிறது. அதன்படி ஏப்ரல் மாதத்தில் 5.39 சதவீதமாக இருந்த பணவீக்கம் மே மாதம் 5.47 சதவீதமாக உயர்ந்துள்ளதாக மத்திய அரசு அறிவித்துள்ளது. சில அத்தியாவசிய பொருட்களின் விலையேற்றமும், உணவுப்பொருட்களின் விலை ஏற்றம் காரணமாக சில்லரை வர்த்தக பணவீக்கம் அதிகரித்துள்ளதாக கூறப்பட்டுள்ளது. குறிப்பாக தினசரி தேவையான காய்கறிகளின் விலை ஏப்ரல் மாதத்தை விட இருமடங்கு உயர்ந்துள்ளது. ஏப்ரல் மாதத்தில் 4.82 சதவீதமாக இருந்த உணவுப்பொருட்களின் பணவீக்கம், மே மாதத்தில் 10.77 சதவீதமாக உயர்ந்துள்ளது. மொத்த பணவீக்க விகிதம் 6.32 சதவீதத்திலிருந்து 7.55 சதவீதமாக உயர்ந்துள்ளது. கடந்த சில மாதங்களாக பணவீக்கம் அதிகரித்து வருவதால் ரிசர்வ் வங்கி வட்டி விகிதத்தை குறைக்குமா என்ற எதிர்பார்ப்பு எழுந்துள்ளது.